Wednesday, March 26, 2008

بلد المحبوب


يملأني حزن غريب هذه الليلة ، احتسيت قهوة المساء ، واخذت ابحث عن أغنية السهرة ، افعل هذا كل ليلة تقريبا منذ سفر أحمد ، لم اختر اغنيات لانغام ولا لفيروز .. انها ام كلثوم .. انها "على بلد المحبوب" ... انها مصر.. تحضرني روحها الليلة واريد ان اشكو لها وتواسيني .. . مصر ، ماذا يحدث بيننا ؟؟

استعد للسفر الي دبي .. حياة جديدة .. هناك صار يعيش زوجي .. هناك ربما نجد حياة افضل لاولادنا .. ومن هناك يهاتفني احمد كل يومين يبلغني بقرار العودة لمصر .. يناقشني .. ندور في نفس الاسئلة .. نظل كمن يقطف اوراق الورد بحثا عن الاجابات : مصر .. دبي ... دبي .. مصر .. دبي .. دبي ... الحياة صعبة هنا قوي .. وعلينا ان نكون واقعيين .. تنتهي المكالمة .

انا اهرب من الحياة في القاهرة .. ليس تحديدا .. بل اهرب من صعوبات حياتي في القاهرة .. بتعبير اكثر دقة : صرت اخشى على اولادي من القاهرة .. ليس علي ان اخاطر بمستقبلهم .. انه السفر .. لعلها الورقة الأخيرة :دبي ، على بركة الله

تستحق مصر الا يهرب ابناؤها ، ويستحق ابناؤها ألا تعذبهم ..صارت المعادلة صعبة والدومينو مقفولة .. وانا صرت كلما سمعت اسم مصر يقشعر بدني

مصر حين تأتي في نشرة الأخبار تأتي كأميرة خطفها اللصوص : من يصدق ان مصر يمثلها في القمة العربية مفيد شهاب ؟؟ ولا على رأيكم ... يمكن يعرف يتكلم في السياسة احسن من حسني مبارك ، ومصر قامتها اكبر من هذا وذاك

ومصر في الشارع تبدو كطفلة من أطفال الشوارع لم تجد من يمشط لها شعرها الاسود ، ولا من يغسل عنها قذارة النوم ، على الارصفة .. تبحث عن رغيف فلا تجده .. اية قسوة هذه يا قاهرة ؟؟

مصر متعبة في مكاتب الموظفين ، مكدسة في فصول التلاميذ ، متشيئة كقطعة موبيليا يورثها رجل خرف لابنه الأخرق ، وهي مصر التي هزمت نابليون وغيرت الاسكندر ... مصر تستحق افضل من ذلك

يفرح قلبي كلما أتتني رسائل من أصدقائي تدعوني لاضراب 6 ابريل ، اقول في نفسي : ممكن ؟؟ آه بتحصل .. ليس معقولا أن يعيش مبارك بلا نهاية ... وان عاش عمرا طويلا فليس منطقيا ان يفسد لنا ما تبقى من اعمارنا القصيرة .. اتذكر انه مرت أيام كثيرة ظننا فيها ان النظام على وشك السقوط .. ولم يسقط .. في كل مرة كان يزيد أملنا .. يصير مبارك أكثر ضعفا .. تبدو شيخوخته بادية أكثر .. تتسع مساحة كراهية الناس له ولا يسقط .. في الحقيقة نحن الذين لم نمد يدنا لندفع بقليل من القوة .. ربما نكون راهنا على السقوط الذاتي .. بس ركلة قدم واحدة ومصر هتجيب جون ..

يوم 6 ابريل سيجرب الناس الاضراب : بروفة العصيان المدني .. هذا ما تستحقه مصر

فمازالت لدي احلام هنا ... والله .. هاسافر يا مصر وكل احلامي اني ارجع هنا وما اطولش الغيبة .

19 comments:

Unknown said...

ومصر في الشارع تبدو كطفلة من أطفال الشوارع لم تجد من يمشط لها شعرها الاسود ، ولا من يغسل عنها قذارة النوم ، على الارصفة .. تبحث

----------------

حقول ايه بعد الكلام ده ؟

يا ترى قدر و لا اهمال من شعب و حكومة و لا عدم اعتزاز و لا أستسهال و لا أيه ؟ و ليه ؟


مدوتى و احترامى

مدحت محمد said...

حنة
هو كله بيهاجر وبيسيب مصر ولا ايه
وبالذات دبى
او الامارات بوجه عام
البلد طفشت
من اللى بيحصل فيها
الحياة فى مصر بقت صعبة فعلا
والعصيان المدنى وان محضرتش المظاهرة
فااكيد اكيد
مش رايح الشغل
تحياتى ليكى

Ahmed Al-Sabbagh said...

رائع جدا

انا قريت بوست عن فتافيت كلام بيأكد كلامك اوى

وهى كمان على فكرة مسافرة الامارات الاسبوع الجاى

مش عارف والله انا حزين على مصر اوى

بجد

تحياتى لكى

احمد الصباغ

جميز said...

و الله يا مصر لنمسح دمعتك
و نلم شبابك و نغسل طرحتك
و تغنى الصبايا فى ليلة فرحتك
ما هو اللى خانك و سرطن عيالك وهد مقامك
دا اصلة جاحد و بيكرة ترابك .....ومش مننا

أحمـــــد علـــــــى said...

آآآآآآآآه يا بلدى...
كله بيجرى منك .. بقيتى عاملة زى أنثى التمساح .. ترقد على البيض لغاية ما تجوع .. ولما البيض يفقس تاكل كام تمساح من ولادها الصغيرين وتسيب الباقى يعيش.. غاااابة
الصورة اللى حاططها بتقول مش هنسيب .. بس مبقاش ينفع .. بفكر جديا أسيب وأسافر.. أهرب من الساقية المربوط فيها ليل ونهار
مصر تستاهل أحسن كن كدة كتيييير قوى
حسبنا الله ونعم الوكيل

حنة said...

عاليا .. شرفتي المدونة.. بس ده مش قدرنا .. انا برضه مش عارف احنا مستنيين يحصل ايه تاني في البلد .. الله كريم
استاذ مدحت .. اولا لازم احييك على موقفك بالمشاركة في الاضراب ... وصحيح كله بيهاجر ويسيب مصر .. ومش سعدا بده بس الحياة هنا بجد بقت صعبة قوي
احمد الصباغ : انا كمان قريت البوست بتاع فتافيت كلام ، قريته بعد ما كتبت البوست ده وبجد خفت على اولادي يبقوا كده ادعي لي يا رب نقدر نرجع بسرعة وحياتنا تبقى هنا ومصر كمان يتصلح حالها .. نورتني بالزيارة
جميز .. انا بحب فيك احساسك الوطني بجد وان شاء الله مصر هتخرج من ازمتها
احمد علي .. بص انا مش زعلانة من مصر انا زعلانة عليها .. ومصر بجد محتاجانا ..

Marwa Friday said...

صباح الفل يا حنة
أنا قريت التدوينة الجميلة دي في الفيس بوك
والله أنا زيك متمسكة بالبلد لآخر نفس
مش قادرة أتصور اني أسيبها.. عارفة شعورك وحاسة بيه لكن كما يقال ما باليد حيلة
الإمارات بلد عربي برضه
:)
ما علينا
يا رب البروفة تنجح وتروحي وترجعي بالسلامة وتحققي اللي انتِ بتتمنيه آمين يا رب
تحياتي

إنسان || Human said...

في النهاية هاترجولها برده..مهما طال البعاد هاترجعوا ..يمكن القرار صعب في البداية ..بس صدقيني لما تلاقو نفسكم خلاص أستقريتوا هناك والأولاد خدوا على المكان...سنين عايشين في الغربة
هايكون القرار أصعب
قرار العودة
هنا تنقلب حياتهم رأساً على عقب
مع أنها مش غربة بالمفهوم بتاعها زي غربة أوروبا مثلاً لكنها في النهاية مش بلدهم ...هاتكوني عملتي زي ماتكوني رميتهم من قمة الحبل لقاعه ...وإسأليني أنا
بعد 14 سنه بره ...جيت مصر وحصل إلي حصل
بس الحمدلله

wael said...

قبل ما يتفهم كلامي غلط
انا اذوب عشقا في البلد دي
بس بصراحه مافيش في البلد حاجه واحده تستاهل ان الواحد يستنى مصر بقت ضيقه اوي على ولادها
السفر قرار اكثر من حكيم
اسف للتدخل

قبل الطوفان said...

حنان

تعالي، فقد حان وقت الرحيل
أي البلاد تستحق أن نبقى فيها وهي التي تعجز عن منحنا الطمأنينة!
قولي لزوجك إن الرحيل لا يعني سوى إعادة اكتشاف لمدى قدرتنا على حب مكان بتروا أطرافه وقطعوا لسانهم، حتى صار "بلدهم" هم..وليس بلدنا جميعا

رئـــــيسـة حزب الأحلام said...

السلام عليكم
البلد كل يوم تقفل علينا وماحدش راضى يحمينا

محاولة لكسر الصمت said...

كلام بسيط وجميل جدا........فعلا حرام أوي يبقى ده حالك يا مصر.بس يا ترى فعلا يوم 6 أبريل هيبقى علامة مهمة في تاريخ مصر.ولا هيعدي زيه زي أي يوم.......6 أبريل.مستنياااااااااااااااااااك بفارغ الصبر..

ابو العربى said...

بأذن الله الحل فى ايدينا يوم 6 ابريل ستكون المفاجأه
كلامك اكثر من رائع ووصفك لحال مصر قشعر مشاعرى

تقبل تحياتى

مي بهاء الدين said...

مصر بقت قاسية على ولادها أوي يا باشا

فاكرة الجملة دي من عمارة يعقوبيان؟ معرفش ليه قعدت تلح على دماغي وانا باقرأ البوست ده..ومش عارفة أطلب منك تفضلي في مصر لأنها بقت قاسية فعلا
ومش عارفة أقولك سافري..لأن مصر ليها برضه مكان في القلب بنت اللذينه
انا احترت والله

تحياتي يا حنونة ومدونتك حقيقية أوي وطالعة من القلب
:)

ghkholy said...

حنان
من فضلك تعالى
ليكى عندى كلمتين
http://kollshy2ok.blogspot.com/2008/03/blog-post_6938.html

http://kollshy2ok.blogspot.com/2008/03/blog-post_30.html

yasmina said...

الله يكون بعونكم
لكل شيء نهاية ومحدش بيعيش للابد
بالاخر بيتغير ان شاء الله وبتتغير الاحوال للافضل

الله يوفقك بسفرك وتربي اولادك وترجعي بالسلامة

تحياتي

MariumaZ said...

عارفة يا حنان أنا حاسة بيكي أوي في حكاية السفر دي... القرار ده بالنسبة لي أنا وعلي قرار مصيري.. والواحد فعلاً مش بيسافر علشان الرفاهية وعلشان يمنجه نفسه أكتر من إنه يأمن مستقبل كويس لأولاده .. ففكرة السفر وخصوصاً في ظل وجود الأولاد شيء حتمي... مش مهم أنا أجوع أو جوزي يجوع ... المهم إن غحنا مش حنقدر نستحمل نشوف ولادنا مش عارفين يتعلموا ولا ياكلوا أكل نضيف ولا يشموا هوا نقي
للأسف مع حبي لمصر كبلد فقط لا غير(ليس شعباً ولاحكومة) إلا إني مضضطرة أقول نعم لأي فرصة سفر تحسن الدخل وتخللي الواحد يعيش حياة كريمة في البلد دي
وبعدين أرض الله واسعة... مصر بقت البلد الظالم أهلها .. وكمان غير أهلها
مابقتش بتاعتنا خلاص

حنة said...

صباحك ورد يا مروة
عارفة الموضوع مش في بساطة اني متمسكة بالبلد او بايعاها ، انا معنديش مانع في السفر .. وفكرة الطموح المهني مهمة برضه .. بس انا صعبان علي مصر وحالتها .. وحالتنا فيها .. كان جميل اننا نسافر واحنا مكرمين في بلدنا
human
انا ما بابصش للموضوع كده ، يعني احنا ممكن نرجع السنة الجاية او اللي بعدها ، وممكن نعيش هناك 20 سنة .. ده مرتبط بعوامل مهنية وليست مادية واحنا عموما مش من انصار الاستقرار قوي
وائل لا تعتذر للمداخلة .. مداخلتك مهمة وانا شفت البلوج بتاعك حلو فعلا
د. ياسر منور .. ما تقوله هو ما يؤلمني فعلا

عموما انا جاية ان شاء الله وهاتصل بيك اول ما اوصل دبي
فالأهل في الغربة وطن

حنة said...

رئيسة حزب الاحلام .. نورتي .. بس مين ممكن يحمينا اذا فرطنا احنا في حقوقنا
دواير
وضد الظلم .. انا خايفة يكون توقعاتنا ل6 ابريل اكبر من مجرد يوم
رجاء متابعة البوست اللي فوق
مي .. هي دي الحيرة اللي محيراني.. نفسي انجح واعيش كويس واربي ولادي كويس بس في مصر .. مش ف حتة تانية
يا سمين : ان شاء الله هارجع
مريم : انا فعلا قررت اكون مواطن الاوي ينتمي لأرض الله الواسعة .
نورتم المدونة وزدتموها دفئا ومودة