Sunday, March 16, 2008

أشياء البهجة .. الصغيرة


كنت مكتئبة جدا
بس خلاص انا زي الفل
حاجات كتير فرحتني
حتى وانا في عز الاكتئاب كان مجلس الحرب اللي عقدناه انا وفاطمة خير ودعاء الشامي من الحاجات اللي بسطتني قوي
ومع ان خطة الحرب لم تنجح
طبعا كالعادة بسببي انا
بس يكفينا التمثيل المشرف
واحساسي ان جنبي صديقات زعلوا قوي لما سمعوا صوتي حزين وجم جري للدعم والارشاد
حتى اغنية انغام اللي باسمعها من يومين بتبهجني رغم حزنها
ورغم انها بتعلم قلبي يرضى بقليله
النهاردة خرجت وشفت الشارع
كنت مفتقدة نسمة الربيع
وهاتجنن كل يوم وانا حاسة اني محبوسة والجو حلو كده
خرجت مع حمزة ونور ومحمد اخويا
ونجحت أخيرا اعمل شعر نور كيرلي
وكنت مبسوطة بيها قوي
حتى وهي بتقول لي عاوزة تتجوز رشدي
اللي هو احمد حلمي في فيلم "جعلتني مجرما"
فرحت قوي .. البنت كبرت
وقعدت اضربها بالمخدات
ماكنتش عاوزة اقولها اننا كمان بحب احمد حلمي لتسوق فيها
كفاية حمزة وحكاياته مع نانسي عجرم
اتبسطت كمان ان حمزة انتصر اخيرا في معركة القمصان
حمزة من 9 شهور مقرر ما يلبس تيشرتات
وبعد مقاوحة مني في كل مرة استسلمت
واتعلمت منه ضرورة ان ادافع عن خياراتي.. بصلابة
كمان لما شفت صورة سارة النهاردة حسيت ان واحد من احلامي بيتحقق
ان يكون عندي بنت شبه البنت بتاعة عائلة زيزي
وكمان اشتريت لنفسي هدية عيد الأم
واكتشفت ان لسه فيه حاجات ممكن تسعدني
حاجات صغيرة وهاعملها
وحاجات كبيرة وبرضه هاعملها
ان شاء الله

4 comments:

الشموع البيضاء said...

واكتشفت ان لسه فيه حاجات ممكن تسعدني

جميل موضوعك وحتى بكلماته البسيطه قدرتى تنقلى لينا الاحساس بالتفاؤل وانه حتى من حاجات صغيره ممكن تدخل لنا البهجه والسرور والرضا..يارب دايما تكونى فى سرور ورضا وكلنا كمان معاكى
اوقات بنقع فى بئر مظلم الى هو الاكتئاب وبنكون محتاجين بس لشعاع نور عشان ينورلنا الظلام ده ..منتظرين المزيد ومنتظره زيارتكز..تحياتى

MariumaZ said...

تحفة يا حنان التدوينة
بجد في عز الإكتئاب والضيق ساعات الواحد بيلاقي السعادة في أشياء بسيطة أوي المهم يكون بيحبها زي مثلاً تليفون لواحدة صاحبتك تفك عنك... كتاب... فيلم كوميدي بتحبيه... مواقف حد من العيال عملها وكانت تضحك... شوكولاتة... أكلة حلوة... أغنية بتحبيها.. كده يعني

ربنا يسعدك كمان وكمان

dr.Roufy said...

فعلا دا من لطف ربنا بينا
ان في عز لحظات الظلام بنلاقي نقط نور نشوفها وتشوفنا
ومهما كانت صغيرة بتخرجنا من الممر المظلم دا

مودتي

micheal said...

جميل أوي يا حنان روح التفاؤل في وسط الاومات و المشاكل اليوميه اللي كلنا بنعيشها
ربنا يخليلك حمزه و نور و محمد
تحياتي